Mae cefnogwyr gwaith cadwraeth Cymdeithas Eryri wedi codi cyfanswm o £5,728 mewn addunedau a chyfraniadau drwy gyfrwng Her Nadolig y BigGive, a gynhaliwyd yn gynharach y mis hwn.
Bydd cyfraniadau yn rhoi hwb i’n hymgyrch Adfer Byd Natur Eryri. Trefnwyd eisoes 100 o ddyddiau gweithredu cadwraeth yn 2022, wedi eu cefnogi gan ymgyrch wybodaeth i helpu mwy o bobl i wneud eu rhan gydag edrych ar ôl tirluniau a chynefinoedd Eryri.
Meddai Cyfarwyddwr Cymdeithas Eryri, John Harold:
“Rydym yn falch iawn o fod wedi gallu mynd y tu hwnt i’n targed o £3,200 erbyn diwrnod tri yr ymgyrch saith-diwrnod! Yn ystod y pandemig, rydym wedi gorfod newid o godi arian wyneb-yn-wyneb i wneud hynny ar-lein ac rydym yn ddiolchgar dros ben i’n cefnogwyr am eu parodrwydd i addasu.”
Ychwanegodd:
“Diolch arbennig am y cyfraniadau a gawsom gan ein Haelodau Busnes Ross a Kate yn RAW Adventures, tîm siopau Joe Brown, ac aelod Cymdeithas Eryri Derek Clarke, gan fod eu cyfraniad hael wedi ein cynorthwyo i fynd ymhell y tu hwnt i’n targed.”
Gwyliwch y gofod hwn ar gyfer ein hymgyrch codi arian ar-lein nesaf.
Mae Cymdeithas Eryri, a sefydlwyd ym 1967, yn elusen gofrestredig sy’n seiliedig ar aelodau sy’n gweithio i ddiogelu a gwella harddwch a rhinweddau arbennig Eryri ac i hyrwyddo eu mwynhad er budd pawb sy’n byw, gweithio yn yr ardal neu’n ymweld â hi nawr ac yn y dyfodol.
JOIN as a member to support our work.
The Snowdonia Society
Caban, Brynrefail, Caernarfon, Gwynedd LL55 3NR
info@snowdonia-society.org.uk
